A mostra ‘Defensa de Ferrol: A batalla de Brión’ desenvolverá seis aspectos do acontecido en 1800: o contexto histórico, os escenarios, os seus protagonistas, as armas e tropas, as vestimentas e uniformes e, por último, a propia contenda. Instalarase no antigo almacén de cureñas da fortaleza e será compatible con outras mostras de carácter temporal
O Concello de Ferrol ven de perfilar os contidos que desenvolverá ‘Defensa de Ferrol: a batalla de Brión’, a exposición permanente sobre a batalla de Brión que instalará no antigo almacén de cureñas do castelo de San Felipe. Esta iniciativa forma parte do programa Interreg Espazo Atlántico 2014-2020 para o proxecto MMIAH (Maritime, Military and Industrial Heritage of the Atlantic Area Coast), un plan liderado por Ferrol e integrado por outras oito cidades —Cádiz, Ílhavo (Portugal), Plymouth e Liverpool (Inglaterra), Caen e La Rochelle (Francia), Limerick e Cork (Irlanda)—.
Os bloques temáticos da mostra serán seis, e incluirá diversos elementos gráficos e visuais para explicar os acontecementos dos días 25 e 26 de agosto de 1800 e poñelos en valor. O primeiro, o contexto histórico da batalla, versará sobre o momento no que se produciu o ataque dos ingleses a territorio ferrolán, tendo en conta que o contorno xeopolítico a nivel internacional entre España, Francia e Inglaterra é “fundamental para entender as motivacións do ataque”, explicou Eva Martínez Montero, concelleira de Patrimonio Histórico. O segundo bloque abordará os escenarios, como os montes de Brión e Doniños, o propio castelo, a situación da cidade e das súas murallas, e arsenal, o porto e as baterías. En terceiro lugar, a exposición ‘Defensa de Ferrol: a batalla de Brión’ dedicará outro bloque aos protagonistas do sucedido, tanto do bando británico como do español, e repasará os personaxes máis importantes da loita, como John Borlase Warren, James Pulteney ou o Conde de Donadío.
O cuarto apartado da mostra fará un reconto gráfico das armas e do número de tropas coas que contaban os dous bandos e explicará as súas características máis importantes. Pola súa banda, as vestimentas e os uniformes dos exércitos constitúen un tipo de patrimonio moi rechamante, polo que ocupará o quinto bloque da futura exposición no castelo de San Felipe. O sexto e último apartado estará dedicado exclusivamente á contenda, cun percorrido diacrónico que comezará o día que os ingleses se aproximaron a Ferrol ata que marcharon. O fin, explicou Martínez Montero, é “amosar os aspectos máis relevantes que aconteceron no escenario físico, as manobras e as pasaxes máis importantes da batalla”. Está previsto que a mostra se materialice no primeiro semestre do 2021.
Posta en valor dun episodio histórico A posta en marcha da exposición ‘Defensa de Ferrol: a batalla de Brión’ intégrase na estratexia xa avanzada polas concelleiras de Promoción Económica e Turismo, María Teresa Deus, e de Patrimonio Histórico de poñer en valor un episodio histórico cun gran potencial para darlle proxección exterior a Ferrol tendo en conta que se trata “dun dos acontecementos máis relevantes da biografía da nosa cidade”, apuntou Martínez Montero.
O impulso da exposición únese ás actividades que se desenvolveron o pasado verán para conmemorar o 220.º aniversario do intento de invasión británica, que incluíron recreacións, visitas guiadas ao castelo e a elaboración dun vídeo promocional. A intención é que o próximo verán se poida organizar unha conmemoración de máis entidade, xa que a deste ano quedou reducida debido ás restricións sanitarias por mor da pandemia.
Trátase, en palabras de Martínez Montero, de “darlle ao noso patrimonio histórico o valor que merece e de dotar de contido museográfico o castelo, comezando por un espazo magnificamente rehabilitado” como é a sala cureñas. Para a edil, darlle utilidade ao antigo almacén significará “garantir o seu mantemento” ao tempo que “seguir avanzando nas melloras que necesita a fortaleza”, como a recuperación da batería baixa e unha actuación que recolle pequenas obras en diferentes puntos do recinto. Ambas, coma a futura recreación virtual do castelo e as baterías de costa, forman parte tamén do proxecto MMIAH. Unha mostra “atractiva e de calidade” que xere “curiosidade” O fin do Concello de Ferrol co deseño de ‘Defensa de Ferrol: a batalla de Brión’ é poñer a dispor dos visitantes unha mostra que logre “transmitir a importancia do episodio histórico” a través dunha exposición “entretida, atractiva e de calidade” que logre xerar “curiosidade” ao redor da batalla de Brión, rematou a concelleira.